Lectura Rumantscha

La frestgera la pli enconuschenta

La frestgera la pli enconuschenta da la Svizra ha survegnì cumpagnia. La Chamanna Cluozza en il Parc Naziunal Svizzer aveva l’onn passà gudagnà il premi dal public Prix Montagne pervi da sia gestiun persistenta e cumplessiva. Ina part da quest concept è la frestgera a Zernez, nua che osps pon prender ora mangiativas e las transportar en la Chamanna Cluozza, uschia ch’i dat damain sgols da helicopter. Cun ils daners dal premi han ils gestiunaris cumprà ina segunda frestgera. En l’intervista ha la guardiachamona Nicole Naue anc raquintà dad auters plans. Ed il redactur da la FMR ha tradì qualas mangiativas ch’el ha purtà sin quasi 1900 meters sur mar.

Sch’ils battagls mettan si pneus

A Lumbrein han gì lieu l’emna passada concerts tut spezials: Ils zains da la baselgia Sogn Martin – dal reminent era il zain grond ch’è dapi 150 onns en il clutger – han dà in concert cun battagls enzugliads cun pneus ed en baselgia èn gongs stads d’udir. Procurà per quels tuns spezials ha Peter Conradin Zumthor. Per ils Lumerins e Lumerinas eran quels concerts, ditg diplomatic, interessant. Ils osps dad ordvart la val eran percunter intgantads.

Suenter las vischnancas vegnan las plaivs

Las fusiuns na sa ferman era betg davant la chasa da Dieu. Suenter las vischnancas en Surselva èn ussa las plaivs en roda. En la Foppa vulan pliras plaivs evangelicas fusiunar. Il dumber da cartents e cartentas è tranter auter memia pitschen en las singulas plaivs. La fusiun ha però bunas schanzas e la benedicziun è quasi segira.

A revair e bun divertiment cun la Lectura Rumantscha!