Lectura Rumantscha

Las notgs vegnan pli lungas e las glischs pli impurtantas. Quai senta era la Lectura Rumantscha che va l’emprim en il kino stgir e suenter en la notg clera.

Il film d’action sursilvan

Atgnamain fissi da prender in pachet popcorn e da giudair las acziuns che van vi e nà sco en il kino. Ma deplorablamain vai per insatge fitg impurtant, numnadamain il provediment da sanadad. La fin da november voteschan las bleras vischnancas sursilvanas davart las cunvegnas da la SanaSurselva. Ina na vegn però betg a votar: Laax. Quai ha la Dretgira superiura decidì. In plant da Schluein e Laax vul ussa dentant insumma impedir la votaziun. Igl è pelvair sco en in film d’action.

Glisch ed umbriva a Breil

Er en Surselva, però pli paschaivel e ruassaivel èsi stà la fin d’emna a Breil. En la stgiradetgna da la notg han installaziuns da glisch en tuttas colurs e furmas impressiunà visitadras e visitaders. Il festival «Breil glischa» ha celebrà la glisch cun sias varts sumbrivaunas en tuttas fassettas.

Contacts per l’integraziun

Era la saira, però bain illuminà, èsi vegnì discussiunà a Mustér, ma atgnamain pertutga il tema l’entir Grischun, sche betg perfin l’entir mund. Co integrar persunas che vegnan dad ordvart en in vitg? La glieud stoppia esser en contact ina cun l’autra, è in facit da la discussiun ch’il Forum Medelina ha organisà. Quel contact sto però vegnir dad omadus mauns, dals indigens e dals tratgs nà.

A revair e bun divertiment cun la Lectura Rumantscha!