Lectura Rumantscha

Il vitg sfundrà en las undas e l’istoricher en las actas

Il patratg che jau stuess bandunar mia chasa pervi d’in lai da fermada fa starment. Ma sco che nus savain, è quai capità en plirs lieus. La populaziun da Marmorera ha per exempel stuì far fagot, avant che l’aua ha inundà 1954 ses vitg. L’istoricher Thomas Joos aveva scrit ils onns 1980 sia lavur da licenziat davart il destin da Marmorera. Igl è stà ina retschertga en archivs fin amez la notg e per part cun tratgs da crimi. Uss è quella lavur cumparida sco cudesch en ina versiun reelavurada e cumplettada.

Communitgar cun rispli e fieuter

Mes med da communitgar sco schurnalista è il pled. Quai è mia fermezza. Cun rispli e fieuter na sai jau entschaiver nagut – il cuntrari Rolf Giger. Il caricaturist e cartoonist pleda cun maletgs, e quai gia dapi sia uffanza. Cun 13 onns ha el gia fatg ina illustraziun per la Polizia chantunala dal Grischun. Pli che quatter decennis pli tard mussa Rolf Giger ussa per l’emprima giada ses dissegns en in’exposiziun.

Il schef da persunal diplomatic

Pervi da la guerra en l’Iran ha il persunal da l’ambassada svizra a Teheran stuì dad in di sin l’auter bandunar il pajais. En quella evacuaziun cumplitgada è era stà involvì Chasper Sarott. Sco schef da persunal tar il Departament federal d’affars exteriurs raquinta il Sentiner da sia lavur tranter diplomazia e conflicts.

Lavur cumina per la nova plazza da sport

La Lumnezia spetga gia daditg sin ina nova plazza da sport. Ussa vegn quella pli concreta. Sin l’areal da Bual sur Vella duai la plazza existenta vegnir engrondida ed era survegnir in nov bajetg d’infrastructura. Quel duai tranter auter vegnir realisà cun lavur cumina.

A revair e bun divertiment cun la Lectura Rumantscha!