Lectura Rumantscha

Famos – Maissen – Sarott

Buna elecziun! – Quai pudess ins giavischar a Grischunas e Grischuns il zercladur 2026, il mais da las elecziuns. Alura èn tant las elecziuns da Regenza e Cussegl grond sco era quella dal presidi da la Lia Rumantscha (LR). Ed era per quest post vegni a dar in cumbat electoral. Las delegadas ed ils delegads da la LR pon eleger tranter in co-presidi cun il duo Urezza Famos/Bernard Maissen ed in presidi cun Chasper Sarott sco solist.

3000 uras da saut

Igl è ina statistica impressiunanta: sut il num Dance Fun ha Sonja Lombriser instruì durant 22 onns saut a Glion e conturn. Durant quest temp ha la dunna da 43 onns realisà radund 200 curs cun 2300 uffants e 420 coreografias. Quai saja en tut pli u main 3000 uras da saut, constatescha la sautunza che surdat proximamain la batgetta da Dance Fun en novs mauns.

Dad alv a nair

En moda fitg simplifitgada pudess ins resumar la vita dal giuven conventual frar Laurentius Sauterel cun trais frasas: El ha midà dad Yverdon a Mustér, ha midà il scussal alv dal mediciner cun la rassa naira dal muntg ed ha midà ses num da Laurent a Laurentius. Anc betg midà n’ha el dal reminent la lingua. Ma sper il studi da teologia saja ina da sias finamiras apunta da pudair tschantschar insacura rumantsch.

A revair e bun divertiment cun la Lectura Rumantscha!