Lectura rumantscha

Las duas fatschas da David Flepp

Midar dad ina scena a l’autra dal tiran franzos tar il pader bainvulent. L’actur David Flepp gioga en il gieu en il liber «1799 – Revolta ella Cadi» a Mustér ina rolla dubla: il commissaire Tromage e pader Placi Spescha. Cun la midada dal costum saja el automaticamain l’autra figura, tradescha David Flepp en l’intervista cun la FMR. El prendia or da mintga figura ina fassetta u l’autra per sia lavur sco actur. Da sperar èsi che David Flepp na daventia betg Dr. Jekyll and Mr. Hyde cun quella rolla dubla.

La premiera è gartegiada

Questa primavaira ha la trenadra Bea Caduff-Seiler survegnì in telefon surprendent: Sche sia squadra, il Team Surselva da dunnas, vuless dar la proxima stagiun en la 2. liga? Cun in terz plaz en la 3. liga fissan las Sursilvanas restadas en la medema liga, ma ina restructuraziun ha purschì quella pussaivladad. Bea Caduff-Seiler e ses team han lura acceptà suenter curta ponderaziun e fatg il pass en ina pli auta liga. Questa fin d’emna ha l’aventura cumenza endretg cun l’emprim gieu da la stagiun encunter Cuira. E la premiera è gartegiada cun ina victoria.

Tuttina betg star a sulegl a Vazarouls

La populaziun da Brinzauls na po tuttina betg far fagot e dischlocar a Vazarouls. Quella novitad era forsa per nus surprendenta, dentant betg per il president communal dad Albula/Alvra Daniel Albertin. Vazarouls saja gia stà al cumenzament ina zona da discussiuns giuridicas, quai hajan era las persunas savì che vulan bandunar Brinzauls. Uschia stat la spunda sulegliva betg a disposiziun per il nov dachasa per quels da Brinzauls.

Bun divertiment cun in u l’auter radi da sulegl e cun la Lectura Rumantscha!