Lectura rumantscha

Oz vai en la Lectura Rumantscha per istorginas detg particularas. I va per animals rars, per acziuns spezialas e per votaziuns insolitas.

Da la corna a la trofea

Has ti gia vis ina giada ina tala chaura da chamutsch sco sin la fotografia? Quella ha sajettà Dumench Fallet da Müstair durant questa chatscha en la Val Mora. E sa chapescha è la fotografia cun l’animal mort ed il chatschader fortunà era sa tschentada en la famusa gallaria da fotografias dad RTR. Senza dubi vegn il chatschader da Müstair a preparar la testa per exponer sco trofea. Ma co èsi da far quai exact? – Nossa collega Patrícia Tschuor-Marques ha laschà buglir ora tut ils tips e trics.

Il «talpino» da Lumbrein

Sas ti co pigliar talpas? Pli baud era quai gea in pitschen «sport» cun quellas traplas a zanga. Ma il «talper» Bistgaun Capaul da Lumbrein ha fatg egls sco muras questa primavaira. Ils 24 d’avrigl ha el piglià ina talpa alva – in albino. Ins pudess era dir: in «talpino»! Ma daco datti insumma quel fenomen natiral e quant derasà è quai tar las talpas? In expert manegia: «Fitg rar.»

Sche models chaminan tras las giassas

I dat paucs vitgs pli pittorescs che Guarda. Ma apunta, quai è gea er in dals gronds problems dal vitg engiadinais: El è daventà culissa per cudeschs d’uffants, per schurmas da turists e per films. Ma insatge n’è Guarda anc mai stà: in catewalk, per bun rumantsch in lieu per ina «Modeschau». Ina saira dal favrer 2027 vegni numnadamain a dar tras las giassas dal vitget in defilé cun models che portan vestgadira dad ina marca da luxus. Latiers datti liongias e vin chaud, sco ch’igl è vegnì proponì tar ina saira d’infurmaziun quest’emna.

E tge din quels da Laax e Schluein?

E tge datti anc auter ch’è rar, particular u spezial? – En Surselva pon ins segir garnir cun quels attributs las discussiuns e la votaziun en connex cun il provediment da sanadad en la regiun. Per exempel sa tschenta la dumonda, sche Schluein e Laax pon insumma cundecider u betg? Nus avain dumandà per ina giada la «glieud per via» e betg las autoritads communalas.