Lectura rumantscha

Sandro Buchli
FMR

Oz reparta la Lectura Rumantscha puncts!

12 puncts per Livio Chistell

«Twelve points go to…» ni: «12 puncts per…Livio Chistell!» Amez il travasch da l’Eurovision Song Contest (ESC) è er in Sursilvan. Il moderatur da RTR/SRF Livio Chistell ha l’onur d’annunziar ils puncts che la Svizra dat a las producziuns da tschels var 25 pajais per lur prestaziuns musicalas. «Quei ch’jeu astgel far uonn al ESC ei per mei la pli cuorta e pintga, denton il medem mument la pli gronda caussa», tradescha el a la FMR. Chapaivel, il spectactul musical è ina festa da las superlativas: radund 160 milliuns aspectaturas ed aspectaturs guardan l’eveniment che cumenza ils 12 da matg a Vienna.

12 puncts per il museum medelin

Ti pos vesair ed admirar – las chasas, la baselgia, ils culms. Ma sas ti era, co che tes vitg tuna? Il tutgar dals zains-baselgia, las atgnadads dal dialect u la ramur da l’aua dals dutgs. Exact quai è la finamira dal nov museum medelin a Pardé. L’istoricher d’art Albert Lutz ha curatà in’exposiziun che duai svegliar l’interess per ils tuns particulars da la Val Medel. Jau avess ditg, en il jargon da l’ESC: Era quai ha merità 12 puncts!

12 puncts per Tabasca e Tulipana

Ils nums da vatgas e mugias e sterlas chat jau adina puspè insatge fascinant, u forsa era in pau schreg! Tenor mai è quai adina er in indizi per l’originalitad da la pura u dal pur. 12 puncts repartess jau ad «Orca», «Tabasca» u a «Tulipana». Sonda passada è stada l’exposiziun da biestga districtuala a Lantsch, nua che era anc bler auter muvel è vegnì valità e premià.