Lectura rumantscha
FMR
Il dinosaur a Tschlin
Nua has ti passentà la fin d’emna? En in lai, sin in piz u giu en tschaler? Jau deplorablamain en la chalira da Cuira. Jau avess però gugent barattà il biro stitg da la FMR cun ina spassegiada tras Tschlin. Là avess jau scuvert il dinosaur dad Ueli. Natiralmain n’avess jau betg chattà in fossil, mabain pistas da minigolf amez il vitg realisadas da dus artists appenzellais. Els han fatg quai or da tuttas sorts restanzas – eba per exempel or da laina laschada enavos d’in tschert Ueli. Sche ti has ussa survegnì mirveglias dal minigolf amez Tschlin, l’acziun è stada unica. Ma l’artitgel da Michael Steiner resta.
La nova entrada a Mustér
Betg be si en ils auts da Tschlin èsi stà pli frestg che a Cuira, probablamain er en il Postigliun a Mustér. Ils possessurs da la bar sutterrana, Christina e Pirmin Monn, han però actualmain ina testa chauda. Els ston engrondir l’entrada per che lur local correspundia a las mesiras da segirtad en cas d’in incendi. E quai custa ina massa. Els han la letga: serrar u organisar ils daners. Quai fan els tranter auter cun in crowdfunding. Forsa po quel sfradentar ils chaus a Mustér.
La tribuna reconstruida a Trun
Zarli Carigiet è enconuschent per sia chanzun «Miis Dach isch dr Himmel vo Züri». Quella «dimora» fiss per il cabarettist ed actur da Trun ch’è mort dal 1981 ussa però er in pau chauda. Perquai avess el segir fatg il pass sin sia «tribuna per ina persuna», ina installaziun rotabla cun umbrivals. Ina exposiziun en la Casa Carigiet a Trun ha reconstruì quella tribuna. E tgi che vul, la po emprestar per crear in program artistic u simplamain per avair in pau sumbriva.
A revair ed ina lectura frestga!
Gust da leger dapli?