Lectura rumantscha
FMR
In nov di cumenza adina bain cun nova lectura. Oz è tut spezialmain nov, perquai ch’i va per restaurar, reveder, refar u reparar.
Il chau stgavazzà da Johannes è zuppà
I dat in maletg ch’era adina davant mes nas, sche jau gieva a messa a Müstair (durant mes temp d’uffanza). Igl era in maletg plitost macaber: Salome, la figlia da Herodes, sauta cun il chau stgavazzà da Johannes sin in plat davant la cumpagnia da festa. Igl è in dals pli famus frescos da la baselgia Son Jon a Müstair. Ma dapi plirs onns è quel maletg zuppà davos puntanadas. Il fresco vegn restaurà. Noss collega Dario Müller ha pudì guardar als restauraturs sur las spatlas.
Il fier chaud da Surcuolm
Quai ch’è nov na sto betg per forza plaschair a tai ed a mai. Quella frasa tutga la noda tar in grond project da surfabricaziun a Surcuolm. Dapi quatter mais procura quel per chaus cotschens tar ina gruppa d’opposiziun a Sursaissa Mundaun (foto). Uss ha quella lantschà in’iniziativa, ed in referendum metta la gruppa er anc en vista. Survegn Surcuolm pia ina nova fatscha dal vitg u betg?
Prender enta maun mintga fiffa
In’engiavinera per tai: Quantas fiffas u tibas ha in’orgla da baselgia? Jau sun propi stà surprais a leger en l’artitgel da Hans Huonder che l’orgla da la baselgia da S. Gions a Mustér haja 1392 fiffas! Mintgina da quellas prendan Roland Koch ed Eric Trummer uss enta maun per far ina revisiun totala. Silsuenter avess l’orgla puspè da tunar (e vesair or) sco avant 50 onns, cura ch’ella era vegnida inaugurada.
Far fagot cun la rulotta vers Cunter
Has ti era plazzà insanua ina rulotta, sco in da noss collegas da redacziun? Quel ha parcà ses vehichel insanua sper in lai en Italia. Er a Savognin, sin il campadi «Julia», èn plazzadas varsaquantas rulottas. 24 da quels vehichels han però stuì far midada ultimamain sin ordinaziun dal Chantun. Ina part dal camping è numnadamain en ina zona da privel, e perquai sto l’areal vegnir refatg ed amplitfitgà cun ina nova surfatscha. Fin che quellas lavurs èn terminadas, han las 24 rulottas survegnì in parcadi transitoric a Cunter. Jau schess: A Cunter èsi era bel!
En quel senn pia: Scua nova scua bain!
Gust da leger dapli?