Lectura Rumantscha
FMR
Il frar pign ch’è mort
Igl è ina tematica che smatga – uffants-staila. Uschia numnan ins uffants che moran anc avant la naschientscha. Co che bab e mamma san elavurar in tal destin, sur da quai datti blers cudeschs ed agid. Pli pauc tematisà vegnan ils fragliuns da l’uffant-staila. Nadia Schütz (19) da Falera enconuscha questa situaziun, ella è la sora dad in frar mai naschì. En sia lavur da matura – ch’è dal rest vegnida premiada dal chantun – ha ella scrit e malegià in mussavia che dat tips co ir enturn cun la situaziun. In tip è: tschantschar surlonder.
Exchavaziuns a Mustér
Con veglia è la chasa, nua che ti abiteschas? E sas ti insumma quai? – I fiss bain bel sche ti savessas dir che tia chasa ha survivì in brischament da l’entir vitg sco era in’invasiun militara. Exact quai è il cas er a Mustér sper la Via Cavardiras. Là stat – pli probablamain – la pli veglia chasa abitada. Archeologs èn ussa vi da guardar, schebain quai è propi il cas. Ella datescha dal 12avel tschientaner – ed è cunquai varga 800 onns veglia. Jau met patg, la chasa nua che ti vivas n’è betg uschè veglia!
Recurs a Lantsch
Anc gnanc bajegiadas èn las chasas da la societad d’abitadi Lantsch. Là impedescha in recurs la construcziun da spazi d’abitar pajabel per passa 60 persunas. Per la patruna da construcziun, ina societad da natira idealistica, èsi ina situaziun frustranta: «Atgnamain fiss tut pront, ma ussa metta in recurs tut en privel», declera il president da la societad Donat Simeon. Ensemen cun auters indigens s’engascha el gia dapi blers onns per dapli spazi d’abitar pajabel en la vischnanca surmirana. Quel è scart, Lantsch ha ina quota da segundas abitaziuns da varga 70 %.
Gust da leger dapli?