Lectura Rumantscha

Toni Vinzens
FMR

«Vita brevis, ars longa» – la vita è curta, l’art è lung. E quai vala era per la lectura dal di.

Il stil da vita decida

Co viver uschè ditg ed uschè saun sco pussibel? – Cun questa dumonda sa fatschenta il trend da la «longevity», ma er il perscrutader da Cumbel Filipe Barata. El lavura a l’ETH a Turitg en il center per intervenziuns digitalas per la sanadad e sa per exempel ch’ils gens èn be responsabels per 25 % per la durada da la vita. Pli impurtant saja percunter il «lifestyle» ubain il stil da viver. La durada da la vita dependa tranter auter, da quant sport ch’ins fa, quant stressà ch’ins è u per tge partenari u partenaria ch’ins sa decida. E perquai èsi era cusseglia da ponderar bain, cun tgi ch’ins sa lia per adina.

Il museum rebel

Il Muzeum Susch datti «pir» dapi bun endisch onns. E tuttina ha el gia ina lunga istorgia. Quel sa chatta numnadamain en mirs vegls. Il dudeschavel tschientaner èn quels stads il dachasa d’ina claustra, pli tard d’ina bieraria ed ussa dal museum da Grażyna Kulczyk. Ma in museum nullotgquindesch n’è quel betg, sco che la promotura d’art polaca ha ditg. Anzi, i saja in pau in museum rebel per ovras «d’artistas invlidadas, malvissas o refüsadas.»

In nov mir sitg

Ina lunga istorgia haja era la veglia via da transit da Pasqual envers il Létg da Canova. Gia ils Romans sajan passads per quella, sco ch’il nov parsura da la Cuntrada culturala tumleastgina Marco Ronchetti ha declerà l’emna passada, quai dentant a chaschun d’in nov mir sitg. Quel ha ina gruppa d’emprendistas ed emprendists construì en connex cun in curs da construir tals mirs. E sco ch’i para è quella tecnica dal 19avel tschientaner fruntada sin grond interess.

A revair e bun divertiment cun la Lectura Rumantscha!