Lectura rumantscha

Oz vai vairamain per vita e mort en la Lectura Rumantscha. Ma nagina tema, per fortuna vai per vita e mort quasi mo en furma istorica u metaforica.

La claustra en flommas

L’onn 1799 ha la Surselva gì pauc da rir. Armadas en crusch e traviers. E lura il punct culminant trist: La claustra da Mustér en flommas! Per tai e per mai è quai strusch imaginabel oz. Ma en Surselva gievi quel onn per vita e mort. In gieu al liber cun il titel «1799 Revolta ella Cadi» sa regorda questa stad da quels schabetgs. E l’autur dal toc, Hubert Giger, di en il purtret: «Uiara ei buca la soluziun.»

La nova plazza da Lai

Mintgatant pudess ins crair ch’i giaja tar gieus da ballape per vita e mort. Betg mo tar il campiunadi mundial, mabain era en gieus da la quarta liga. Il FC Lai-Valbella è actualmain gist vi da renovar ses «champ da battaglia» ed ha mess giu quest’emna in nov tarpun artifizial. L’interessant tar quella plazza amez la fracziun da Lai èn las dimensiuns: 92 m sin 52 m. Atgnamain detg pitschen. Ma noss redactur Toni Vinzens declera pertge che l’associaziun ha tuttina lubì quella grondezza.

Il stgazi rumantsch

Sas ti tge che questa locuziun sursilvana vul dir: «Quei fuss in bien dad ir per la mort»? – Igl è ina frasa per descriver ina persuna che ha forsa in pau ditg dad ir per insatge. Ma danunder vegn quella frasa? Nua ed en tge connex vegn ella duvrada? Exact da quellas dumondas respunda l’Institut dal Dicziunari Rumantsch Grischun a Cuira. Il schef da quel sa descriva sco tgirader dad in «stgazi» linguistic.

Il laud uffizial vers Rona

Muniziun ed armas stattan normalmain en connex cun delicts u guerra. Ma il davos mais èn vegnidas «festivadas» armas e muniziun en il chantun Grischun a la Festa federala da tir. La tradiziun dal tir viva – e come! Il stand da tir il pli «extern» è stà quel da Rona. Il president da la festa, Martin Candinas, ha visità il Surmeir curt avant la fin da l’occurrenza ed ha ludà ses collegas da Rona.

Bun tun, buna lectura e blera pasch!