Lectura rumantscha

Blers han forsa durmì pauc la notg da dumengia sin glindesdi, causa il final dal campiunadi mundial da ballape. Perquai dat la Lectura Rumantscha ussa schlantsch. Il pled «rumantsch» sa rima gea cun «schlantsch»!

«Street-workout» enstagl da «vitaparcours»

Sche ti dovras in pau forza per vegnir en svung, lura ta cussegliass jau dad ir en il «street-workout» a Savognin. Quai tuna sco in studio da fitness. Ma igl èn mo singuls urdegns per trenar cun l’agen corp la fitness. Pli baud eri anc da currer e far «vitaparcours». Il «street-workout» da Savognin è atgnamain mo in accessoire da la nova plazza da padel a La Nars (foto). Tge, ti na sas betg tge che padel è? – In nov sport da moda. Precis sco avant onns il «vitaparcours», ch’i dat dal rest anc adina.

La vista davent dal tscharescher

Has ti mintgatant er uschè bler svung en tai che ti savessas rampignar si per in tscharescher? Quai ha numnadamain fatg l’anteriur redactur da televisiun Beat Manetsch si Flond. Sper sia chasa è numnadamain in bel tscharescher. Apaina arrivà sisum, ha el guardà enturn ed è sa ditg: «Tgei bellezia, quei stuess ins malegiar cun ieli.» Intgins onns pli tard expona el in’ovra multifara en il Museum Cuort Ligia Grischa a Trun.

Or dal «plus» datti in «minus»

Cun svung e schlantsch aveva la vischnanca da Scuol preschentà l’entschatta 2025 in plan ambiziunà per engrondir e concentrar sia infrastructura da scola. Cun optimissem è tut vegnì numnà: «Scoula Scuol+» (foto). Ma entant hai dà or dal «plus» in «minus»: La situaziun finanziala da la vischnanca na permetta betg (memia) gronds sigls e surtut las naschientschas n’èn betg propi en il plus. Perquai sto tut vegnir reponderà.

Co realisar «nossa chasa»?

Pliras vischnancas dattan svung e gas. Ellas ston chattar soluziuns e mesiras per cumbatter il manco da spazi d’abitar. Ma ils instruments per promover emprimas abitaziuns èn fitg differents a Tavau, Claustra, Puntraschigna, Cuira u Vaz. Nus ta dain ina survista. Ed ina fitg interessanta varianta datti er en Surselva. Cun il num «Nossa Casa» duain vischnancas vegnir animadas da «deliberar» edifizis communals per far ordlunder abitaziuns.

Damai giavisch jau a tai oz: Bler schlantsch rumantsch!