Lectura rumantscha

Mintgatant na vai betg da sez. Mintgatant dovri sustegn da sura, da sutensi u da l’exteriur. Quai mussan exemplaricamain las istorgias da la Lectura Rumantscha dad oz.

Cun sustegn da la Pologna

Vegnissas ti sin l’idea sturna da construir ina via sur il Pass da Tomül? Igl è in pass che va sin passa 2400 m s.m. e collia Vals cun la Val Stussavgia. E tgi construiss ina tala via? Cler, i dovra agid da lavurers da l’exteriur e circumstanzas spezialas. Durant la Segunda Guerra mundiala han schuldads internads realisà la «Via da Polacs» sur il Tomül (foto). Ussa è quel traject vegnì sanà.

Esser «top» cun 100%

San Murezzan è top en plirs reguards, era cun ils pretschs d’immobiglias. Politicamain è San Murezzan stà ils davos onns plitost in furmicler. Forsa perquai dovra la vischnanca magari sustegn da dadora per occupar il presidi. Durant otg onns ha l’artist turitgais Christian Jott Jenny presidià il «Top of the World». A partir dal 2027 èsi in oriund Surmiran e scolast da sport: Adriano Iseppi (foto san.). Envers RTR ha quel sincerà ch’el veglia lavurar 100 %, era sch’il pensum da president dotà tar Jenny mo cun 80 %. Lain dir uschia: Cun l’onurari dal presidi da San Murezzan n’èsi betg da guardar uschè exact sin il pensum.

L’aua sto vegnir da sura

I duvrass ussa vairamain agid da sura. L’aua manca dapertut. Surtut la Surselva è pertutgada da la sitgira. Ma tge vul quai dir per ils peschs en la regiun? Noss collega Hans Huonder è ì cun il survegliader da pestga Roland Tomaschett sper in dutg che maina pauc’aua. Tenor Tomaschett stuessi perfin dar ussa «quater entochen tschun dis» plievgia.

Il venter da la mamma a Rona

Ti enconuschas segir l’Openair Lumnezia. E lura forsa anc dus u trais auters festivals sut tschiel avert. Ma enconuschas ti il Pachamama-Festival? Tar quel sa radunan dapi trais onns passa 2000 persunas sin la planira a Rona. Paschaivel, ecologic e senza drogas. E magari crodan sin l’areal da tendas era frasas sco questa: «La tenda simbolisescha il venter da la mamma.» Noss collega Sandro Buchli è en mintga cas ì en tschertga a Rona dal spiert e sustegn da sura, quel da la deessa sidamericana Pachamama.

Damai, bun sustegn da sura, da sut, da dretg e da sanester cun la Lectura Rumantscha!