Lectura rumantscha

Oz vai en la Lectura Rumantscha per las chaussas impurtantas sin quest mund: raps, presidis ed ­«Älplermagronen».

Pajar cun bancnotas e munaida

Nua has ti tia bursa, per nus Svizzers e Svizras il «portemonnaie»? Per dir la vardad vegn jau savens or da chasa senza quel «porta-munaida», perquai che tut è en il telefonin. Ma tuttas e tuts n’èn betg sco jau e forsa sco ti. I dat persunas che lessan anc pajar cun francs e raps, cun bancnotas e tschincuns – schegea ch’i dat adina pli paucas pussaivladads da far quai. Berta Caminada da Panaduz cumbatta cun in’inziativa chantunala per mantegnair il sistem da pajar cun munaida en il spazi public. Ed en l’intervista conferma la dunna pensiunada che si’iniziativa haja ­recaltgà las suttascripziuns necessarias.

Tschertgà: presidenta u president

Avessas ti forsa mustgas da candidar sco presidenta u president da la bella vischnanca da Bravuogn Filisur? – Avant passa in onn ha il president actual, Luzi C. Schutz (foto) communitgà da sa retrair quest december, suenter nov onns en uffizi. Ma tut tschertgar e dumandar n’ha apparentamain gidà nagut. In mais avant l’elecziun n’ha anc nagin mors en il mail «asch» da Bravuogn Filisur. Perquai anc ina giada la dumonda: Avessas ti forsa mustgas per il presidi?

Ina chamona per in’emna

Vulessas ti passentar intgins dis gratuit sin ina bellischma chamonna alpina en Engiadina Bassa? – Lura avess jau in grondius tip: la Chamonna Linard. Tut l’istorgia ha simplamain in pitschen crutsch! Ti stuessas lavurar e manar durant in’emna quella chamonna da la secziun regiunala dal Club alpin svizzer (CAS) – e forsa servir macaruns d’alp (Älplermagronen) cun buglia da maila, sco sin la fotografia. La Chamonna Linard ha numnadamain dapi 30 onns in sistem da gestiun alternanta ed emnila. E sco ch’il chau-chamona Sepp Erni di, èsi simplamain in «grond dalet» da far quella lavur.

Dumondas e dumondas

E tge marscha ussa cun il Spital regiunal da Glion? Tge purschidas dal provediment da sanadad restan en Surselva? Tgi decida e tgi paja? E cura vegn decis tut quai? – Ti vesas, jau hai anc inqual dumonda. Forsa ti era? Ina u l’autra empruvain nus da respunder.