Lectura Rumantscha

Bun di a la lectura dal di cun in sguard enavos sin la fin d’emna.

Zarli dapertut

Tge vegn endament a tai cura che ti audas il num Zarli Carigiet? In grond schnuz? Grimassas legras? U forsa il frar Alois Carigiet? A mai va immediat la chanzun «Mis Dach isch de Himmel vo Züri» tras il chau. E quella melodia m’accumpogna lura era per l’entir di fin che jau ser la notg ils egls. Ella è simplamain dapertut, sco er il festival en memoria da Zarli Carigiet a Trun. Diesch pitschnas tribunas han dà plazza a saut, chant e tuttas sorts dad art la fin d’emna. Il num dal festival «Dapertut» è stà program – e la chanzun da Zarli Carigiet n’ha segir era betg mancà.

Il voluntari da l’entschatta ennà

Dapertut en l’Engiadina Bassa èn ils davos dis era stads da vesair bikers, e quai pli savens che usità. Il Bike-Maraton dal Parc Naziunal Svizzer ha gì lieu, e quai per la 25avla giada. E cun il maraton ha era Simon Rohner da Lavin festivà il giubileum da 25 onns sco voluntari da la cursa. Nus faschain ina giada in grond bravo a Simon Rohner enstagl als curridurs e curriduras.

Festa e piztgadas

Er il Cussegl grond è stà da viadi la sonda, ma betg en l’Engiadina Bassa cun velo, mabain a Savognin. Là ha Fabio Luzio festivà da camifo sia elecziun sco president dal parlament grischun. Tradiziunalmain tegnan ils presidents da las fracziuns a la festa pleds umoristics cun piztgadas cunter collegas. Forsa procuran quellas era tar tai per ina u l’autra risaglia. Jau almain ha stuì rir – da camifo.

E senza risadas na vai era betg tar la revista dal mais da noss schefredactur. Bun divertiment pia era cun il Mais da pais!