Lectura Rumantscha

Sesas ti durant leger questas lingias? U giaschas ti sin in canapé u en letg? – Oz vai numnadamain per sutgas e letgs …

Il «Viadi a Jerusalem» a Berna

Enconuschas ti il gieu dal «Viadi a Jerusalem»? Durant mes temp da scolina numnavan nus quel mo il «gieu da la sutga». Il clou: Ins prenda adina davent ina sutga, lascha ir musica e cura che la musica finescha, èsi da seser. Insatgi vegn adina a la curta, na vegn betg da seser. Quest onn fan ils parlamentaris grischuns il «Viadi a Jerusalem» en Chasa federala. I dat in sez grischun damain en il Cussegl naziunal. Per la paja vegn libra ina sutga gist dasperas, en il Cussegl dals chantuns. Nossa collega Claudia Cadruvi declera il punct da partenza, avant ch’il gieu cumenza!

Ina benedicziun che vegn da Glion

La claustra dominicana da Glion ha memia blera plazza, per uschè dir memia blers letgs. Gia dapi in temp ponderescha il convent perquai tge far cun l’edifizi marcant sin la spunda sur la citad. Ed in segund problem: Las mungias na vegnan betg pli giuvnas e dovran tgira. Proximamain fan sis dad ellas midada en Lumnezia, en la chasa da tgira e d’attempads Da Casa a Vella. Per quella instituziun è l’arrivada da las mungias ina benedicziun, perquai che quellas prendan cun sai gist anc lur persunal. E persunal da tgira è fitg tschertgà en il Da Casa.

Anc dumondas?

Restain damai gist en la medema «branscha», tar ils letgs da tgira. Quants letgs da spital e da tgira manegias ti ch’i dat en Surselva? En l’avegnir vegnan quels gea gestiunads pli u main tuts en la medema rait, la «Reit da sanadad». Ma l’emprim sto vegnir votà davart quella organisaziun. En vista a quella votaziun en la regiun datti anc fitg, fitg bleras dumondas. Noss collega Toni Vinzens respunda las pli impurtantas. Ina dumonda na respunda el dentant betg: Quella davart la cifra totala dals letgs da tgira!

In podcast per pazientas e pazients

Damai na bandunain nus betg pli quels letgs da tgira. Sche ti giaschas forsa en l’avegnir (u ussa?) en in da quels letgs, lura ta recumond jau il tip dad Annetta Janka-Zini. Lura vegns ti forsa a savair gist tge che capita insumma en l’ospital.