Lectura Rumantscha

RTR en in tumult medial

Tgi avess pensà che RTR procuria ina giada per in tumult medial svizzer. Jau betg. Ma gist quai è capità mardi passà. 20 Minuten e Blick han rapportà ch’ina organisaziun cunter la chatscha crititgescha la Chasa da medias rumantscha ch’ella na rapportia neutral da la chatscha, surtut areguard sias concurrenzas cun las pli bellas fotografias da chatscha e la preda. La FMR emprova da far urden en quel tumult. 

Suenter placats datti paragrafs

Quai era gia da pensar che las protestas cunter serrar las scolas a Ftan e Tarasp restan be tar placats. In proxim chapitel vegn scrit uss en quell’istorgia: Ina gruppa da persunas da Ftan e Tarasp ha fatg recurs cunter la decisiun da la suprastanza da Scuol: La decisiun cuntrafetschia al contract da fusiun. Ussa sto la Dretgira superiura dal Grischun decider. Als placats seguan pia ils paragrafs.

Il foss gigantic a Schluein

Jau sun mintgatant da viadi en Surselva cun l’auto. Schluein è fin ussa però adina be stà in vitg da transit per mai. Dal pli grond plazzal da la Surselva sur il vitg da Schluein n’hai jau durant mes viadis percurschì nagut. Ma gist quel plazzal duai procurar che jau poss er en il futur viagiar segir tras Schluein, e forsa ina giada schizunt far in paus per contemplar il foss gigantic che duai retegnair bovas.

A revair e bun divertiment cun la Lectura Rumantscha!