Lectura Rumantscha

Il schurnalissem vul savens mussar tge che stat (u sa zuppa!) davos in maletg, davos ina persuna u davos in schabetg. Precis per talas istorgias, per las istorgias «davostiers», vai en la Lectura Rumantscha dad oz.

La schurnalista ch’è in chanun!

Ina buna schurnalista (rumantscha) scriva var trais artitgels durant in’emna. Texts retschertgads, scrits cun premura e bain chapaivels. En il mund schurnalistic dal Grischun datti dapi questa stad ina nova reportra: Seraina Cadonau (foto). Quella è in chanun! Dapi ch’ella rapporta dal Grischun, dapi l’avust 2026, ha ella scrit 125 artitgels. Ma l’istorgia davostiers è main divertenta, perquai che Seraina Cadonau e ses collegas-agents pudessan metter en privel il schurnalissem classic. Noss collega Dario Müller è perquai ì a la tschertga da la super-reportra.

Davos il mir baselgia

I dat ils «pfuschs» evidents tar in plazzal da construcziun. Lura pon ins – sch’i va bain – far valair prestaziuns da garanzia. Ma mintgatant vegnan ils sbagls a la glisch pir cun blers onns retard, schegea ch’i na sa tracta gnanc da sbagls. Anzi, las lavurs eran vegnidas fatgas en tutta buna fai e surtut sut autras circumstanzas. Quai sa mussa uss a l’intern da la baselgia da Segnas. Ils mirs alvs vegnan grischs, era pervi da sanaziuns d’antruras. Bainprest duvrassi ina sanaziun.

Las intervistas per leger tranter las lingias

Sche ti ed jau avain dad eleger ina persuna per in post politic, lura servan magari intervistas per far la «dretga» tscherna. Grazia a tals discurs èsi pussaivel d’eruir tge che stat «davostiers»: Tge è la motivaziun dal candidat? Tge interess represchenta la candidata? Tgi è il candidat insumma? – En paucs dis han las votantas e votants da Scuol d’eleger lur capo, damai che Aita Zanetti n’ha betg cuntanschì la maioritad absoluta en l’emprim scrutini. Quests dis han la Posta Ladina e la FMR publitgà intervistas cun tuts trais candidats che van en cursa – cun Beat Cantieni, Jachen Andri Cajos ed oz cun Aita Zanetti. Però apunta, mintgatant èsi era da leger «davostiers», tranter las lingias.

La moderatura che sa zuppa davostier

In’interessanta anecdota raquinta oz era l’autur puter Göri Klainguti. El è vegnì contactà dacurt via e-mail dad in’enconuschenta moderatura tudestga da vegnir a preleger a Frankfurt. Ma apunta, davostiers sa zuppa in’autra istorgia …