Lectura Rumantscha
FMR
Happy Birthday
Ses engaschi sco motor dal rumantsch grischun ha procurà e procura anc adina per discussiuns. E quai na vegn probablamain era betg pli a sa midar. Oz gievgia po Bernard Cathomas numnadamain festivar ses 80avel anniversari. E sco ch’el ha ditg en l’intervista a quella chaschun, saja il RG stà ina da sias meglras ideas. Gea, era quai po dar da discutar. Ma quai laschain nus per in’autra giada e giavischain oz be tut il bun.
Rument e reciclem
Mintgatant èsi in detg rumpatesta cun il rument. Da zavrar il reciclem ed al sparter dal rument ordinari n’è per part gnanc uschè simpel. Quai sa era l’expert Manuel Montalta che ha perquai lantschà in’acziun. El porscha a la populaziun en Surselva in lavuratori da reciclar en il liber. Quai vul dir participantas e participants rimnan rument a l’ur dal guaud, sin ina via frequentada u en in auter lieu public. E l’expert demonstrescha silsuenter, co ch’igl è da zavrar palpiri, plastic e PET.
In record mundial
Mes record è bun 3610 m s.m. Da viagiar sin quest’autezza è stà in vaira sforz per mai. Per Maurizio Folini è quai probablamain be ina piparia. Il pilot da helicopter ha cuntanschì in record mundial da tut autras dimensiuns. L’onn 2013 ha el numnadamain salvà cun ses helicopter in alpinist nepalais vi dad ina suga lunga sin 7800 m s.m. E quai è fin oz record mundial – per Maurizio Folini dentant prest senza muntada. El transporteschia tuttina pli gugent punts che persunas.
A revair e bun divertiment cun la Lectura Rumantscha!
Gust da leger dapli?