Lectura Rumantscha

Gabriela Riedi
FMR

En la Lectura Rumantscha vegni oz cumbattì, betg per pajais, ieli e vias maritimas. I resta paschaivel, però tuttina excitant.

Cumbats sur passa 2100 meters sur mar

Passlunghistas u maratonists fan stedi trenaments si en ils auts. Uschia producescha il corp dapli corpuls da sang cotschens e po prestar dapli en las cursas. La Festa da lutga chantunala grischun-glarunaisa sonda passada a Motta Naluns ha era procurà per in pau trenament en l’autezza. Sin passa 2100 meters sur mar han lutgaders cumbattì per cranzs – e forsa er in tec per flad.

Cumbats per 120 sutgas

Enconuschas ti il gieu «Viadi a Jerusalem»? Durant che la musica va èsi da girar enturn las sutgas. Però uschè spert ch’igl è quiet, sto mintga persuna chattar ina pussaivladad da seser. Il clou: Igl ha natiralmain pli paucas sutgas che persunas. La dumengia han 522 candidatas e candidatas fatg in «Viadi a Jerusalem» pli extrem. Per il Cussegl grond èn be 120 sutgas stadas a disposiziun. La FMR sa tgi che ha pudì prender plaz e tgi ch’era memia «plaun» per il cumbat per la sutga.

Cumbats che van a fin

Nus restain tar il Cussegl grond, midain però perspectiva. Nua ch’i dat in’entschatta, datti er ina fin. Ier glindesdi è il parlament actual sa radunà per la davosa giada. Per in pèr deputads è quai la davosa sessiun. Els han gia avant las elecziuns decidì da betg pli far il cumbat per ina nova legislatura ed han simplamain pudì observar il «Viadi a Jerusalem» da l’ur.

Ina bella Lectura Rumantscha cun ils cumbats paschaivels!