Lectura Rumantscha
FMR
In proverbi tudestg di: Dar è pli bel che prender. Perquai porscha la Lectura Rumantscha bleras interessantas tematicas.
Tgi dastga prender, tgi sto dar
Ch’ils paupers na daventan betg adina pli paupers ed ils ritgs betg adina pli ritgs, è ina devisa d’in stadi social. Era tranter las vischnancas datti da quellas pli bainstantas e da quellas che ston cumbatter pli fitg cun las finanzas. E perquai datti ina gulivaziun da finanzas. Mardi ha il Cussegl grond debattà sur da las reglas dal gieu tgi che dastga prender or da l’avnaun pecuniar e tgi che sto pajar.
Duas famiglias per Brinzauls
Brinzauls resta anc adina in tema, schegea che la spunda sur il vitg è sa calmada e la populaziun ha pudì returnar en lur chasas. Però: Betg tuts èn returnads. Anc adina restan blers tar il giavisch da translocar preventivamain, uschia che la populaziun è sa smesada. I dat dentant in pau speranza che Brinzauls pudess tuttina crescher in zichel: 14 persunas èn sa domiciliadas da nov en il vitg, tranter quellas schizunt duas famiglias cun uffants.
Il capo dals 15 registers
El è zuppà si en la lautga da la baselgia, el dat però sentur cun ils tuns da ses instrument. Gion Balzer Casanova ha sunà 65 onns l’orgla a Laax. El ha tratg tut ils registers, 15 en tut. A l’entschatta da sia carriera ha el stuì suandar las reglas d’ina baselgia catolica conservativa, suenter lura è in vent frestg ì tras baselgia ed era tras las fiffas da l’orgla. Ussa surdat Gion Balzer Casanova «ses» instrument en nov mauns.
L’aura che prenda las punts
La vischnanca da Medel aveva construì avant sis onns ina punt pendenta, perquai che l‘aua chaschunava adina puspè donns vi da la veglia punt. Uss però è era quella punt periclitada e sto vegnir spazzada. Auas grondas pudessan definitivamain era prender a cor il proverbi tudestg ch’igl è pli bel da dar che da prender.
A revair e bun divertiment cun la Lectura Rumantscha!
Gust da leger dapli?