Lectura Rumantscha
FMR
Svelt-svelt u tuttina mo patgific? Quai è la dumonda en la Lectura Rumantscha dad oz. Perquai, prendai peda!
La dumonda suenter l’anguscha
Tut era ì extrem spert, forsa aifer diesch secundas. Ma i pareva in’eternitad. Avant detg exact 20 onns era jau ina saira sin ina chamona dal CAS, e tuttenina hai cumenzà a ramplunar. In grippun vidvart la val è sballunà aval. In mument dad anguscha andetga. Quella anguscha turna pensond a la bova dal Piz Cengalo dal 2017 che jau hai mo vis en televisiun. Ina bova gigantica e disgrazia tragica cun otg viandants morts. Ed il cas è anc adina avert: Avessan las autoritads stuì serrar pli baud las sendas? Actualmain vegn quella dumonda (giuridica) tractada en in process a Puntraschigna.
Il tempo en vitgs e fracziuns
Jau stoss confessar: Jau e mes auto essan stads memia svelts questa stad. In vitg a mai bain enconuschent ha introducì tempo 30 e la polizia ha natiralmain fatg radar sin quel traject. Jau tgutg sun ì en la trapla! – Insumma, il tempo dat era da discutar dador Scuol, en la fracziun Nairs. La «fracziun Nairs»? Apunta, Nairs n’è atgnamain betg ina «fracziun», silmain betg en la logica dal traffic sin via. Ma pertge che jau scriv quai? Il tempo e la dumonda da la fracziun han apunta dà da discutar en la suprastanza communala da Scuol.
Il «pli aut Grischun» è fitg giuven
Cun grond tempo paress il deputà sursetter Fabio Luzio (PLD) da far sia via politica. Quest’emna vegn il politicher da 35 onns previsiblamain elegì sco in dals pli giuvens deputads en l’uffizi da president dal Cussegl grond. Noss collega Dario Müller ha purtretà il politicher che vuless en ses onn sco pli aut Grischun «motivar autras giuvnas e giuvens da s’engaschar per la politica».
L’agricultura e ses quitads
Mintgatant vegn ditg ch’ils purs planschian memia spert! Ma il davos temp n’ha l’agricultura propi betg gì uschè simpel: tensiuns cun animals da rapina, sitgira, pauc pavel ed uss anc in virus che para da sa derasar tar la muaglia. E malgrà quels pensiers manegia il president da l’Uniun purila Surselva, Silvan Caduff, en in’intervista: «Ins astga era buca malegiar memia ner tut.»
Gust da leger dapli?