Lectura Rumantscha

David Truttmann
FMR

Festas e tragedias sa dattan mintgatant il maun aifer pauc mument. Ils da Tusaun avevan planisà per questa fin d’emna ina festa dal vitg. Igl è vegnì auter.

Quatter victimas en las flommas

La festa dal vitg a Tusaun è numnadamain vegnida annullada pervi dal grond incendi da gievgia sin venderdi. A l’ur da Tusaun è ars in chasament cun restaurant e pliras abitaziuns. La raschun da l’incendi n’è anc betg sclerida. La dimensiun da la tragedia però bain: Quatter persunas moran en las flommas, otg persunas èn vegnidas blessas, duas grev.

Ina festa per «urar e lavurar»

Bler pli plaschaivla è sa chapescha stada la sonda a Mustér. Là ha il frar Benedikt Meier pudì festivar ses profess perpeten. Ta dumondas ti forsa ussa sco jau: «Profess tge?» – A declerar simpel è quai ina sort nozzas dad in muntg, en quest cas dad in muntg benedictin. Mo ch’il frar Benedikt n’ha betg maridà sonda in’autra persuna cun pel ed ossa, mabain Nossegner. E surtut ha el empermess dad «urar e lavurar» per vita duranta. Bun, tar ina lètg normala spetga magari er in pau lavur …

Ina festa cun musica

Tge fiss ina festa senza musica? I dovra silmain in marsch! Sunas ti er in instrument? Jau hai emprais a sunar trumbetta durant mia uffanza a Müstair, en la «Musica da giuventüna». Ma mia carriera da cornettist è ida a finir vers ils onns 2000. Da mes temp existiva la «Scoula da musica Engiadina Bassa/Val Müstair» pir en ina furma fitg rudimentara. Entant è quella s’etablida e festivescha questa proxima fin d’emna ses giubileum da 50 onns. Forsa perfin cun in marsch? – Il mainascola Roberto Donchi, sa legra en mintga cas da far festa a Scuol.

In’istorgia tipica

E per finir anc in’istorgia tipica per il territori alpin – senza festas e tragedias. Amez il territori da skis da Sursaissa sa chatta l’Alp Tegia Miez. Ma quella na tutga betg als purs da Sursaissa, mabain ad ina corporaziun d’alp sisum la Surselva. Quai tuna curius, navair? – Ma la fin dals quints èsi in’istorgina cun interessantas ingredienzas: cun vegls dretgs d’alp, cun in lai da fermada ed in nov indriz da far naiv. – Apunta: tipic alpin!