Lectura rumantscha
FMR
Enstagl da far grondas enumeraziuns da las tematicas, vuless jau oz be tschentar questas dumondas. En urden per tai?
Collavurar cun scolar
Nua has ti fatg tes emprendissadi u tia scolaziun? En ina scola a Cuira u forsa en ina instituziun regiunala? En Engiadina ed en las vals dal sid existan gist pliras instituziuns da scolaziun professiunala – a Samedan, Sta. Maria u Poschiavo. Ma tuttas han da cumbatter: I dat adina damain giarsunas e giarsuns. Questa gievgia passada è vegnida lantschada a Puntraschigna in’iniziativa per collavurar pli stretg tranter las trais regiuns.
Betg adina «pasch, plaschair e plain en pigna»
Es ti gia vegnì mors ina giada dad in chaun? – Sperain betg. Ma sin la Motta Naluns sur Scuol ha in chaun che pertgirava ina muntanera mors en urden. El n’ha betg mo mors in auter chaun da maniera che quel ha stuì vegnir operà. El ha gist era mors en il maun a la possessura da quel chaun. La consequenza: Il nurser ha survegnì ina multa. Quest pitschen cas mussa exemplaricamain: La relaziun tranter turissem ed alpegiaziun n’è betg mo pasch, plaschair e plain en pigna.
Ina scrinaria electrisanta
Tge vesas ti sin questa fotografia sutvart? – Geabain, in implant electric! Ma en vardad èsi la pli gronda scrinaria e lainaria da la Cadi, la Tarcisi Maissen SA da Trun, che dat pajaglia a passa 50 collavuraturas e collavuraturs (e producescha electricitad). L’interpresa ha festivà sonda passada ses anniversari dad 80 onns. Var 1000 persunas èn vegnidas. Jau schess: Quai è electrisant!
Tuts ston vegnir ordlunder
E tge istorgia dat da discutar actualmain en l’entira Surselva, schegea che nagin na vegn pli ordlonder? – Geabain, ti has engiavinà endretg: la SanaSurselva, il provediment da sanadad e la Reit da sanadad. Da tegnair la survista en quella tematica è pretensius. Ma tochen la fin da november stuessan votantas e votants en la regiun vegnir ordlunder. Lura èsi da votar!
E la davosa dumonda: Sas ti ch’i dat glinas blauas? Il columnist Hubert Giger declera e respunda.
Gust da leger dapli?