Lectura Rumantscha

Toni Vinzens
FMR

Per uman ed animal

In bun plimatsch vala bler e dastga era custar in pau. Quai sai jau ord atgna experientscha. Ma in plimatsch per quatter milliuns francs? Quai ma para char e salà. Schegea, il «White Pillow Park» da Glion duai gea esser dapli che be in plimatsch alv per sa metter per lung. Planisà è en la zona da Grüneck in parc cun pistas per trenar e sa divertir en il stil liber sin skis e snowboard, ina halla da sport ed ina plazza da padel. E forsa chattian perfin utschels-mezmieur in dachasa en la tur dal parc, almain tenor in dals iniziants dal project.

Studio empè da cabina

«Buna saira e bainvgnüts pro’l Telesguard.» – Cun quels pleds beneventa Laila Cavelti dapi il settember sia clientella, vul dir las aspectaturas ed ils aspectaturs da la televisiun rumantscha. Quai dentant mo cunquai che ses destin ha prendì ina svieuta. Il siemi da la giuvna moderatura da Puntraschigna fiss numnadamain stà in auter: accumpagnar sco flight attendant passagiers e passagieras en cabina. Sco che Laila Cavelti ha ditg a la redactura Anna Bott, saja ella però cuntenta d’avair pudì turnar tar sias ragischs rumantschas. Ella na sto pia betg star mal per il «bainvgnüts a bord».

Tips e trics per chantar bain

Has ti savì che la scolaziun da la vusch sa basa sin set elements fundamentals? Na? Alura avessas ti la proxima fin d’emna la chaschun da midar quai. Il District da cant Surselva organisescha numnadamain in curs per ina e scadin che vul perfecziunar sia vusch. Tips e trics dat la mezzosopranista Salome Cavegn. In sai jau dentant gia tradir ussa: Avant che chantar a tutta forza, saja impurtant da preparar bain la vusch, uschia la suprastanta dal district da chant ed organisatura dal curs Flavia Walder.

A revair e bun divertiment cun la Lectura Rumantscha!