Lectura rumantscha

Toni Vinzens
FMR

«Pesch» u «pesc»?

Tenor il vocabulari sursilvan èsi «pesch». Tut tenor vitg variescha quai dentant. Per exempel a Sagogn èsi «pesc» – almain sch’ins dumonda ils originals da Sagogn. Questa variaziun è enconuschenta, però strusch documentada. Quai vul la Scola auta da pedagogia dal Grischun ussa midar cun l’Atlas dal Grischun Rumantsch. In tal project è ina novitad per il rumantsch. Singulas ovras forsa betg pli actualas sco l’Atlante italo-svizzero mussan però, co ch’in tal atlas po guardar ora – e quai era per il «pesc» (guarda foto).

Cosmetica per il guaud – e dapli

Ina bella chavellera, quai na vulan betg mo dunnas ed umens, mabain era noss guauds. La differenza è però ch’il guaud na sto betg ir en Tirchia per laschar (trans)plantar chavelins. Almain sch’ins ha la fortuna sco ils guauds da la Val Badugna e la Val dall’Aua a Mustér. Qua han las davosas emnas radund 20 voluntaris e voluntarias dal Project guaud da muntogna gidà da regiuvinar la selva. Quai però betg mo per motivs da cosmetica. I va cunzunt era per la protecziun cunter lavinas.

Prominenza politica al curs da rumantsch

L’interess per il rumantsch crescha ad in crescher, almain tenor las cifras dals curs da rumantsch. Uschia ha era gist il curs intensiv da vallader a Sta. Maria realisà in nov record da participantas e participants: 70 persunas – e lura anc cun prominenza politica! La futura regenta dal Grischun, Valérie Favre Accola, ha tegnì ses pled dal cumbat electoral ed emprenda ussa talian e rumantsch. Tgisà, sch’ella legia da nov era la Lectura Rumantscha?

A revair e bun divertiment cun la Lectura Rumantscha!