Lectura rumantscha
FMR
En scola survegnivas forsa era ti mintgatant l’incumbensa da scriver in cumponiment che tunava circa uschia: «Scriva in text che cuntegna ils suandants chavazzins: trofea, arena, stradun e ‹deal›.» Ecco, mes resultat:
Ina trofea per Susch?
Igl è il siemi da mintga cineasta e cineast da gudagnar in bel di in premi a Hollywood. Bainprest fa ina trofea filmica – in «Emmy» – forsa parada a Susch. La fin d’emna passada ha Claudio von Planta numnadamain gudagnà in «Daytime Emmy Award». Dapi sis onns viva il cineast ed um da camera en Engiadina. El è p.ex. stà l’emprim che ha fatg in’intervista cun il terrorist Osama Bin Laden. Il «Emmy» ha el dentant gudagnà per in’autra producziun. En l’intervista cun Dario Müller n’era Claudio von Planta dentant anc betg segir, sche la trofea fetschia lura propi viadi cun el a Susch.
Il Nordic House sto far fagot
L’edifizi è detg marcant ed ha fatg bella parada gia pliras giadas en televisiun tar cursas da passlung – il cubus da lain da l’arena da biatlon a Lantsch (foto). Ma suenter circa in decenni duai il Nordic House bandunar l’areal da Bual e far plazza ad in nov center da sport. Che la gestiun da l’infrastructura actuala custia memia bler. Noss collega Toni Vinzens è stà a la saira d’infurmaziun a Lantsch ed ha vulì savair tge capita exact.
In «deal» en Surselva
Sch’il concern dal Coop cumprass damaun il Migros, lura procurass quai per lingias grassas. Durant plirs dis rapportassan las medias davart il «deal» naziunal. E co statti cun talas acquisiziuns a livel regiunal? Noss collega Hans Huonder rapporta dad ina tala cumpra en Surselva en la branscha dad installaziuns sanitaras: la Casatec SA a Mustér cun ses 50 collavuraturs e collavuraturas vegn integrada en la Hälg Group, ina gronda interpresa da la medema branscha. A livel regiunal è quai senza dubi in brav «deal».
Bandunar il stradun
Il trend è enconuschent: ils centers dals vitgs sa svidan – en Grischun ed en tut la Svizra. La glieud va ad abitar a l’ur ed ils centers da cumpra s’installeschan er a l’ur. Il stradun sa svida. Sin il «Stradung» da Savognin vegniva organisà durant var 40 onns la «Scuntrada», ina fiera artisanala e regiunala. Ma per evitar conflicts cun il traffic e per revitalisar quella fiera, vegn ussa ponderà ina nova varianta … geabain: Ir cun la fiera a l’ur.
Gust da leger dapli?