Lectura rumantscha

David Truttmann
FMR

Oz pudain nus porscher ina fotogallaria, in tip per far fotografias, ina proposta per in uffizi politic ­ed in’interessanta lectura per sin tualetta.

Vulessas ti esser capo?

Sas ti tge che ti fas dumengia, ils 15 da november? – Sche ti avessas dad avair lungurus, lura pudess jau ta proponer ina pitschna sfida: Candidescha sco capo da Scuol! En il fratemp datti gea quatter candidaturas per il presidi communal, suenter ch’il capo en uffizi, Aita Zanetti (Center), n’ha per il nair da l’ungla betg cuntanschì la maioritad absoluta en l’emprim scrutini. Il quartet da candidats/a cumpletteschan Beat Cantieni (independent), Jachen Andri Cajos (PPS) ed uss er anc il deputà Duosch Fadri Felix (PLD). Oz vegn quel a pled en l’intervista.

Las fotografias da siglir

Jau ta tradesch in pitschen skerz da nossa famiglia: Sche nus essan en vacanzas insanua e stain en parada davant in’attracziun – p.ex. davant la Chasa federala a Berna – lura dumbrain nus «1, 2, 3…» e siglin tuts en l’aria. Lura datti da quellas fotografias divertentas sco quella da la pitschna Antonia da Mumpè Medel che siglia giu da stgala (guarda foto). Quella grondiusa fotografia è publitgada en in nov cudesch da la famiglia Manetsch. Ma quella n’aveva betg mo dis da siglir dal plaschair. Ina gronda tragedia ha sumbrivà l’istorgia da famiglia.

Nua va a finir tut quella rauba?

Mo tranter da nus: Sche ti fas ir l’aua da la tualetta, sas ti nua che tut quella rauba va a finir? – Sa chapescha en la serenera! Ma nua è quella exact? Pli u main quella dumonda sto il suveran da Bravuogn Filisur respunder la fin da quest mais. I va per decider, sche tut il «material» duai ir a finir ad Alvagni. La dumonda ha procurà per in referendum e per rumpatesta. Mes collega Toni Vinzens declera per tge ch’i va insumma.

La reclamaziun va en la proxima runda

Es ti per u cunter? Duai RTR mussar fotografias da predas da chatscha u betg? Publitgar fotogallarias ed emetter salids da chatscha? I dat recurs cunter quella rapportaziun. Entant ha il mediatur da la SRG.R prendì posiziun. Ma la reclamaziun va a la proxima instanza.