Lectura Rumantscha
FMR
Igl 1. da matg van blers a far chauma. Il «di da la lavur» è però en il Grischun in veritabel di da lavur, danor forsa per las pestgadras e pestgaders che han prendì liber per il cumenzament da la stagiun da pestga.
Peschs enstagl burnout
Jau mangel gugent peschs, ma als pigliar? Plitost betg. Jau n’avess betg la pazienza da spetgar fin ch’in murdess. Auter è quai tar Daniel Jositsch. Per el èn quels muments quiets e meditativs gist il fascinant da la pestga. El di schizunt che «pestgar è la meglra prevenziun da burnout». Per in politicher e professer che ha segir bler da far betg il pli tup. Il president da la Federaziun svizra da pestga ha però anc tradì autras chaussas davart la pestga.
La dispita per il Bogn Tenigia
E lura, tgi è uss il possessur dal Bogn Tenigia? Duas partidas sa dispitan per l’hotel en Val Sumvitg ch’è dapi 20 onns bandunà. Il possessur ch’aveva avant trais onns cumprà las aczias da l’hotel è vegnì stritgà or dal register da commerzi senza savair. Ma co diavel è quai pussaivel? In giurist dat scleriment. Tge che jau na chapesch dentant betg è, daco ch’insumma insatge vul posseder ina ruina.
333 chapitschas da Sumvitg
Ir a pestga è plitost in hobi solitari e quiet, nagut da cumpagnia cun gronds baterlims. Tut auter far chaltschiel en gruppa. Durant prender si anzas dretg e sanester vai bain da discutar da Dieu ed il mund. E quai fa l’uniun da dunnas Vinavon da Sumvitg. Ella vul producir 333 chapitschas per buttiglias per l’acziun «Mach dich mützlich». Per mintga buttiglia survegn la Pro Senectute svizra in pitschen sustegn finanzial.
Buna pestga, buna lavur, buna chauma e bun divertiment cun la Lectura Rumantscha!
Gust da leger dapli?