Lectura rumantscha
FMR
L’avegnir è intschert. Oz forsa in pau damain intschert grazia a la lectura dal di.
A la tschertga d’in investur
A Glion, là ha la vischnanca pajà passa tschintg milliuns francs per ses «filet», vul dir l’areal Maissen. Entant ch’igl è pli u main cler, tge che duai capitar cun quel – spazi d’abitar e spazi per mastergns – èsi anc avert, tgi che realisescha quest plan. Ma la tschertga, ubain la concurrenza d’investurs, è uffizialmain lantschada per questa parcella centrala. Dal reminent, l’investur in spe pudess realisar ses project a partir da l’onn 2028.
Ils plans egipzians
Vidvart la Surselva ad Andermatt, là guarda l’investur egipzian Samih Sawiris in pau pli lunsch en il futur. El ha numnadamain gronds plans per in center da sport e divertiment. 5000 m² duai quel cuvrir cun ina purschida da raiver, fitness, yoga, center da temps liber cun ustaria, kids club, bowling, bogns e dapli. Sche la visiun daventa realitad sco planisà l’onn 2032/33, n’è dentant anc betg cler. Sco proxim pass suonda la dumonda da bajegiar.
A la tschertga da la soluziun
A Samedan, là è dapi prest 40 onns l’instituziun Movimento da chasa. La societad che tgira persunas cun impediments a Poschiavo, Scuol ed apunta Samedan guarda dentant vers in avegnir intschert, almain quai che pertutga sia localitad principala. Quella sa chatta en il vegl ospital a Samedan. Quest edifizi appartegna però a la SGO che sa chattà en in moratori. Sche Movimento po restar en ses dachasa, n’è perquai betg cler. Ils responsabels vulan chattar ina soluziun ils proxims mais.
E sche ti vul era savair, co ch’i va vinavant cun la Lia Rumantscha, pos ti leger l’intervista cun Urezza Famos.
A revair e bun divertiment cun la Lectura Rumantscha!
Gust da leger dapli?