Lectura rumantscha

David Truttmann
FMR

En la lectura dad oz vai per utensils che ti ed jau tegnain mintga di enta maun: il tschadun, la furtgetta ed il cuntè – la pusada.

Chavar cun il tschadun a Ramosch

Durant mia uffanza a Müstair devi ina gruppa da lavurants che nus numnavan mo «quels dal sdunin». Sas ti tgi che nus manegiavan? – Quai eran ils archeologs e las archeologas. La claustra da Müstair è gea dapi decennis in grond plazzal da perscrutaziun archeologica. Circa medem ditg vegn chavà e perscrutà a Ramosch, en il conturn da la Mottata. Quests dis ha cumenzà ina nova seria da perscrutaziuns. Noss collega Dario Müller è ì a «chavar» – ed ha vis ch’i vegn chavà al mument anc senza tschadun.

Prender davent il cuntè a Breil

Betg avair tema, ussa vegn il cuntè! Ma i va mo per ina bella moda da dir: «Las pendicularas da Breil Vuorz Andiast han il cuntè a culiez.» Lur problem è acuSituaziun tendida – la vischnaunca sa impedir il mendert: Ils davos envierns hai gì pauca naiv ed il manaschi da skis enturn l’Alp Dado è stà pauc lucrativ. I mancan raps dapertut – per pajar quints e garantir il manaschi. Dad investiziuns basegnaivlas gnanc da discurrer. Ussa stuess la vischnanca prender il cuntè davent dal culiez. Tenor noss collega Hans Huonder n’ha Breil «negin’autra letga».

Far festa cun furtgettas

Probabel èsi era stà tar tai sco poppin il medem: L’emprim has ti emprais da mangiar cun tschadun (la buglia), suenter è vegnì il cuntè (per la charn). Ma la tecnica fina cun la furtgetta è pir vegnida la fin. Er en la canorta Cumbiniala a Vella ston las mussadras probabel mussar di per di als uffantins co ch’igl è da mangiar senza far portgaria. La Cumbiniala exista ussa dapi exact tschintg onns. Bainprest vegn fatg festa – probabel era cun furtgettas.

In mument per dar sustegn

Avant exact in’emna è capitada ina da las pli grondas disgrazias d’incendi dals davos onns en il Grischun. La notg sin venderdi èn mortas quatter persunas a Tusaun en las flommas. Ina chasa cun restaurant ed abitaziuns è arsa. Mesemna han la vischnanca e las baselgias envidà ad ina commemoraziun per las unfrendas. In mument per dar sustegn – senza pudair dar respostas.