FMR
Oz fa la Lectura Rumantscha capriolas tranter sosa da salata, glatsch sintetic ed ina vita senza internet.
Plastic è fantastic
«Plastic è fantastic» – talas reacziuns vuless udir la suprastanza da Tujetsch. Quest’emna è vegnì rasà ora a Sedrun ina cuvrida sintetica che duai forsa remplazzar la patinera da glatsch natiral. La raschun è simpla: I vegn pli e pli chaud – e perquai era pli grev da far glatsch. Quest enviern dastgan Tuatschinas e Tuatschins empruvar ora il «glatsch» – cun dar hockey, curling e trair rudialas! Bun divertiment. E gea betg glischnar ora!
Viver offline
Viver senza internet – quai è daventà in stoda murcs. Gia mo pajar in quint fiss cumplitgà. E tge schess tes patrun da lavur, sche ti dis che ti desistessas pli gugent da l’internet? E co restassas en contact cun tes collegas, sche betg via chat? Mesemna suentermezdi ed era anc la gievgia èn bleras paginas da la rait stadas bloccadas. Jau vuless era esser bloccà ina giada per dus dis – simplamain senza rait!
Sas anc?!
Jau chat che sosa da salata possia tradir bler da tes caracter. Fas ti mintga giada sezza ella, cun ieli, differents aschieus, maionesa, sal e paiver ed ervas e truschas precautamain cun la furtgetta? U es ti ina tippa u in tip che ha pauc peda e cumpra perquai il dressing franzos fixfertig en la stizun? Basta – a la redactura Patrícia Tschuor-Marques è ina sosa da salata spezialmain en buna memoria, numnadamain quella da Silvan.
Bunas capriolas cun la Lectura Rumantscha.
Gust da leger dapli?